ahbab bhi hain ḳhuub ki tash.hir kar ga.e
mera sukut ishq se ta.abir kar ga.e
jadu-asar the honT ki saghar ko chuum kar
kuchh aur hi sharab ki tasir kar ga.e
har uzv jaise jism ka tha bolta hua
lahra.e us ke haath ki taqrir kar ga.e
az-bam ta-ba-mai-kada gesu dhuan dhuan
aalam tamam halqa-e-zanjir kar ga.e
tahrir-e-ḳhatt-e-jam se sab va hue rumuz
ham uqda-e-miyan ki tadbir kar ga.e
haan katiban-e-nama-e-a.amal ko thi kad
kuchh aur meri fard men tahrir kar ga.e
‘sahba’ vo ek lafz tha divar ka likha
ham jo miTe to ishq ki tauqir kar ga.e
Leave a Reply