agar na manen na samho ki jante hi nahin
zidon ki baat bhi hai kuchh mughalate hi nahin
mutalibat-e-mohabbat hain main huun aur tum ho
ajiib hai ye musallas ki zaviye hi nahin
mire junun ke bharose pe kah diya us ne
ham aa.e aap ke ghar par to aap the hi nahin
bayaz-e-dil ki karen to karen kahan islah
kitabat aisi hui hai ki hashiye hi nahin
isi muhit men vapas palaT ke aana tha
to ban ke abr kabhi ja se ham uThe hi nahin
ujaaḌ ho gaya sahra-e-dil ki jaise yahan
ghazal o zaigham o kargas kabhi rahe hi nahin
ab is maqam pe bim-o-raja hain be-ma.ani
ki chahte hain use jis ko chahte hi nahin
yahi hai rasta ab duriyan baḌha.enge
baḌhin ham us ki taraf kaise fasle hi nahin
koi fareb ki ham jis se dil ko bahla.en
talash karte hain ḳhat us ne jo likhe hi nahin
Leave a Reply