abr utrā hai chār-sū dekho
ab vo nikhregā ḳhūb-rū dekho
surḳh īñToñ pe nāchtī bārish
aur yādeñ haiñ rū-ba-rū dekho
aise mausam meñ bhīgte rahnā
ek shā.er kī aarzū dekho
vo jo zīna-ba-zīna utrā hai
aks merā hai hū-ba-hū dekho
apnī socheñ safar meñ rahtī haiñ
us ko paane kī justujū dekho
dil kī duniyā hai dūsrī duniyā
aise manzar ko bā-vazū dekho
ik sukūñ hai agarche bastī meñ
‘sād’ andar kī hāo-hū dekho