abhi maujud thi lekin abhi gum ho ga.i hai
na jaane kis jahan men zindagi gum ho ga.i hai
mire hamrah kyuun vo shaḳhs chalna chahta hai
safar ke josh men kya agahi gum ho ga.i hai
sabhi ḳhush hain ki saare gum-shuda phir mil ga.e hain
mujhe gham hai ki ab teri kami gum ho ga.i hai
mire honTon ko dariya ne kiya sairab lekin
hayat-afroz dil ki tishnagi gum ho ga.i hai
main us se muddaton ke ba.ad dobara dobara mila huun
ḳhushi to hai magar varaftagi gum ho ga.i hai
ye kin tishna-labon ki fauj guzri hai idhar se
kahin kuchh kam kahin puuri nadi gum ho ga.i hai
hamesha jo mujhe izn-e-suḳhan deti rahi thi
hujum-e-shor men vo ḳhamushi gum ho ga.i hai
main us ki yaad se bas ek pal ko gum hua tha
magar lagta hai jaise ik sadi gum ho ga.i hai
ba-taur-e-rasm hi kar-e-junun baaqi hai mujh men
vagarna dasht se vabastagi gum ho ga.i hai
‘salim’ us men ziyada farq to ab bhi nahin hai
bas itna hai ki thoḌi sadgi gum ho ga.i hai
Leave a Reply