Abas

Adil Hayat

mira ghar ajnabi lagta hai kyuun akhir

vo rahen bhi

jo ghar tak le ke jaati hain

kabhi thiin ashna mujh se

magar na-ashna ab hain

bahut mayus huun sab se

mujhe pahchanne vaala

nahin koi

koi rishta bhi ab apna nahin lagta

yahan ki reshmi sub.hen

ujale apne angan ke

udasi se bhari shamen

chamakte raat ke taare

sabhi ye mujh se kahte hain

ki ab ke jab safar karna

jahan jaana

vahin rahna

abas hai us jagah aana

abas hai laut kar aana