Arpit Sharma Arpit
ab dil bujha bujha hai mujhe maar dijiye
jiine men kya rakha hai mujhe maar dijiye
dil ke maraz ka ab nahin duniya men kuchh ilaaj
ye ishq-e-la-dava hai mujhe maar dijiye
main be-gunah huun to yahi hai miri saza
ye faisla hua hai mujhe maar dijiye
Darta huun aa.ine ko lagane se haath main
kahta ye a.ina hai mujhe maar dijiye
main huun vafa-shi.ar yahan ji ke kya karun
ye daur-e-bevafa hai mujhe maar dijiye
vallah be-nashsha na rahi meri koi shaam
ukhḌa hua nasha hai mujhe maar dijiye
ai jan-e-dil-bahar teri be-ruḳhi ke baad
ab mere paas kya hai mujhe maar dijiye
tanha.iyon ki qaid se ghabra ke ek shaḳhs
avaz de raha hai mujhe maar dijiye
ek baat josh josh men sach kah gaya huun main
tum ko bura laga hai mujhe maar dijiye
tanha.i meri us se bhi dekhi nahin ga.i
us ne bhi ye kaha hai mujhe maar dijiye
rashk-e-chaman bana hai ye ‘arpit’ mira vajud
ḳhushbu ko chhu liya hai mujhe maar dijiye
Leave a Reply