ab dard-e-mohabbat ko ai dil minnat-kash-e-darman kaun kare
ḳhud apne hi hathon ulfat ka barbad gulistan kaun kare
jab yaad kisi ki aati hai ik barq si lahra jaati hai
jab ham hi dard ke ḳhvahan hon phir dard ka darman kaun kare
is shan-e-taghaful par aḳhir ji chhuT gaya dil TuuT gaya
jab dil hi hamara TuuT chuka phir aap ko mehman kaun kare
jab barq-e-tapan lahra lahra angḌa.i falak par leti ho
us vaqt nasheman kaise bane taz.in-e-gulistan kaun kare
ab tark-e-sitam ke kya ma.ani har roz naya gul khilne do
do-char daraḳhshan daghon se dil rashk-e-gulistan kaun kare
maqsud hai qadr-o-qimat bhi zeba.ish-e-husn-e-ḳhuban ki
har ḳhuun ke aansu ko lekin ab la.al-e-badaḳhshan kaun kare
ab yaas ka aalam taari hai ye raat bhi ham par bhari hai
ai ‘jauhar’ us ke va.adon par ab ziist ka saman kaun kare
Leave a Reply