Aaya Ufuq Ki Sej Tak Aa Kar palaT Gaya

aayā ufuq kī sej tak aa kar palaT gayā

lekin urūs-e-shab kā vo ghuñghaT ulaT gayā

dil meñ basī haiñ kitnī tire ba.ad bastiyāñ

dariyā thā ḳhushk ho ke jazīroñ meñ baT gayā

ik shaḳhs lauTte hue kal tere shahr se

ro ro ke apne naqsh-e-qadam se lipaT gayā

maiñ chal rahā huuñ ḳhol badan kā utaar kar

ab mere rāste kā ye patthar bhī haT gayā

phailī raheñgī jholiyāñ palkoñ kī kab talak

aayā thā jo umaD ke vo bādal to chhaT gayā

dasht-e-nazar se itne bagūle uThe ‘rashīd’

ik muskurāte chāñd kā chehra bhī aT gayā

Leave a Comment