Rasheed Qaisrani
aaya ufuq ki sej tak aa kar palaT gaya
lekin urus-e-shab ka vo ghunghaT ulaT gaya
dil men basi hain kitni tire ba.ad bastiyan
dariya tha ḳhushk ho ke jaziron men baT gaya
ik shaḳhs lauTte hue kal tere shahr se
ro ro ke apne naqsh-e-qadam se lipaT gaya
main chal raha huun ḳhol badan ka utaar kar
ab mere raste ka ye patthar bhi haT gaya
phaili rahengi jholiyan palkon ki kab talak
aaya tha jo umaD ke vo badal to chhaT gaya
dasht-e-nazar se itne bagule uThe ‘rashid’
ik muskurate chand ka chehra bhi aT gaya
Leave a Reply