Najeeb Ahmad
asmanon se zaminon pe javab aa.ega
ek din raat Dhale yaum-e-hisab aa.ega
mutma.in aise ki har gaam yahi sochte hain
is safar men koi sahra na sarab aa.ega
ye javani to buḌhape ki tarah guzregi
umr jab kaaT chukunga to shabab aa.ega
kab miri ankhon men ḳhun-rang kiran utregi
raat ki shaḳh pe kab aks-e-gulab aa.ega
zard miTTi men ghuli sabz tavana.i ‘najib’
ab zara aankh lagi hai to ye ḳhvab aa.ega
Leave a Reply