Qamar Jameel
asman par ik sitara shaam se betab hai
meri ankhon men tumhara gham nahin hai ḳhvab hai
raat dariya a.ine men is tarah aaya ki main
ye samajh kar so gaya dariya nahin ik ḳhvab hai
kamani surat men bhi ik aarzu hai mahv-e-ḳhvab
sanvli rangat men bhi ik vasl ka kam-ḳhvab hai
meri ḳhatir kuchh sunahri sanvli miTTi bhi thi
varna us ka jism saara raushni ka ḳhvab hai
asman ik bistar-e-sanjab lagta hai mujhe
aur ye qaus-e-quzah jaise koi mehrab hai
kis ke istiqbal ko uTThe the divanon ke haath
kis ke matam ko yahan ye majma-e-ahbab hai
ya allahabad men rahiye jahan sangam bhi ho
ya banaras men jahan har ghaaT par sailab hai
is nahang-e-tishna se zor-azma ho kar ‘jamil’
bhuul mat jaana ki aage bhi vahi girdab hai
Leave a Reply