ashna kab ho hai ye zikr dil-e-shad ke saath
lab ko nisbat hai mire zamzama-e-dad ke saath
bas ki hai chashm-e-muravvat se bhara girya-zar
pada phirta hai mire nala-o-fariyad ke saath
yaad us lutf-e-huzuri ka karen kya hasil
aa pada kaam faqat ab to tiri yaad ke saath
zulm hai haq men hamare tira ab tark-e-sitam
dil ko hai uns sa ik us tiri bedad ke saath
zulf o kakul se qavi husn ka baazu hai mudam
qafas o daam rahe jaise ki sayyad ke saath
khun-e-nahaq raha parvez ki gardan pe vale
lutf-e-shirin ne sitam ye kiya farhad ke saath
rasti se bhala itna bhi guzarna kya hai
nisbat is qad ko na do sarv ke shamshad ke saath
dast o pa kar ke main gum nikla dabe-panv kya
mila vo tifl mujhe raat jo ustad ke saath
‘hasrat’ itna jo tu maail hai giraftari ka
kuchh adavat hai tujhe khatir-e-azad ke saath
Leave a Reply