aarzu le ke koi ghar se nikalte kyuun ho
paanv julte hain to phir aag pe chalte kyuun ho
shohraten sab ke muqaddar men kahan hoti hain
tum ye har roz naya bhes badalte kyuun ho
yuun to tum aur bhi mashkuk nazar aaoge
baat karte hue ruk ruk ke sambhle kyuun ho
haan! tumhen jurm ka ehsas satata hoga
varna yuun raton ko uTh uTh ke Tahalte kyuun ho
aur bazar se ‘ghalib’ ki tarah le aao
dil agar TuuT gaya hai to machalte kyuun ho
tum ne pahle kabhi is baat ko socha hota
peḌ ki chhanv men baiThe ho to jalte kyuun ho
Leave a Reply