Aansu Ko Apne Dida-E-Tar Se Nikalna

Hazin Ludhianvi

aansu ko apne dida-e-tar se nikalna

lagta hai mehman ko ghar se nikalna

sukhe hue shajar men lahhu to nahin hai ḳhushk

konpal koi numu ki shajar se nikalna

is yaḳh-zada faza men gar uḌne ka qasd hai

be-his ruton ki barf ko par se nikalna

jis sub.h ke jilau men shabon ka hujum ho

kirnon ko aise dam-e-sahar se nikalna

jis se shab-e-hayat ka sannaTa TuuT jaa.e

avaz aisi saz-e-hunar se nikalna

sab ka nahin ye ahl-e-basirat ka kaam hai

gahri ḳhabar bhi sat.hi ḳhabar se nikalna

rasta kaThin ho laakh na hona ‘hazin’ malul

pahlu ḳhushi ka ranj-e-safar se nikalna