Gulnar Aafreen
aansu bhi vahi karb ke saae bhi vahi hain
ham gardish-e-dauran ke satae bhi vahi hain
kya baat hai kyuun shahr men ab ji nahin lagta
halanki yahan apne parae bhi vahi hain
auraq-e-dil-o-jan pe jinhen tum ne likha hai
naghmat-e-alam ham ne sunae bhi vahi hain
ai josh-e-junun dard ka aalam bhi vahi hai
ai vahshat-e-jan dard ke saae bhi vahi hain
dekha hai jinhen ah-ba-lab chak-gareban
har dagh-e-alam dil men chhupae bhi vahi hain
sau rang bikherenge mohabbat ke shagufe
‘gulnar’ chaman men hamen laae bhi vahi hain
Leave a Reply