Aankhon Mein Wo KHwab Nahin Baste Pahla Sa Wo Haal Nahin Hota

Hilal Fareed

ankhon men vo ḳhvab nahin baste pahla sa vo haal nahin hota

ab fasl-e-bahar nahin aati aur ranj o malal nahin hota

is aql ki maari nagri men kabhi paani aag nahin banta

yahan ishq bhi log nahin karte yahan koi kamal nahin hota

ham aaj bahut hi pareshan hain is vaqt ke pher se hairan hain

hamen le ke chalo kisi aisi taraf jahan hijr o visal nahin hota

jitni hai nadamat tum ko ab utne hi pashiman ham bhi hain

tum us ka javab hi kyuun socho ham se jo saval nahin hota

vo basti bhi ik basti thi ye basti bhi ik basti hai

vahan TuuT ke dil juḌ jaate the yahan koi ḳhayal nahin hota

is shahr ki riit ko aam karen jhuk jhuk ke sabhi ko salam karen

har kaam to ham kar lete hain yahi kaam ‘hilal’ nahin hota