Sarvat Husain
ankhon men saughat sameTe apne ghar aate hain
bajre laage bandar-gah pe saudagar aate hain
zard zabur tilavat karti hai tasvir ḳhizan ki
ain-bahar men kaise kaise ḳhvab nazar aate hain
gandum aur gulabon jaise ḳhvab shikasta karte
dur-daraz zaminon vaale shahr men dar aate hain
shahzadi tujhe kaun bata.e tere charag-kade tak
kitni mehraben paḌti hain kitne dar aate hain
band-e-qaba-e-surḳh ki manzil un par sahl hui hai
jin hathon ko aag chura lene ke hunar aate hain
Leave a Reply