Aankhon Mein Saughat sameTe Apne Ghar Aate Hain

āñkhoñ meñ sauġhāt sameTe apne ghar aate haiñ

bajre laage bandar-gāh pe saudāgar aate haiñ

zard zabūr tilāvat kartī hai tasvīr ḳhizāñ kī

ain-bahār meñ kaise kaise ḳhvāb nazar aate haiñ

gandum aur gulāboñ jaise ḳhvāb shikasta karte

dūr-darāz zamīnoñ vaale shahr meñ dar aate haiñ

shahzādī tujhe kaun batā.e tere charāg-kade tak

kitnī mehrābeñ paḌtī haiñ kitne dar aate haiñ

band-e-qabā-e-surḳh kī manzil un par sahl huī hai

jin hāthoñ ko aag churā lene ke hunar aate haiñ

Leave a Comment