aankh se is fikr men hota nahin paani juda
ek din ho ja.egi mujh se miri beTi juda
maujib-e-furqat vahan bhi dana-e-gandum hi tha
aur aksar yaan bhi ham ko karti hai roTi juda
vadi-e-dil tak nazar aa.egi ik chhoTi lakir
kar rahe ho aankh se tum jis tarah paani juda
bad-o-baran ne bhi us se dil-lagi kya ḳhuub ki
jo uḌa kar le ga.iin chhatri juda chunari juda
ḳhvahishon par phir musallat ho ga.e duniya ke gham
ho raha hai dil se dhire dhire phir koi juda
der se milta hai jo rishton ke mele men hamen
jaane ho jaata hai kyon ham se vahi jaldi juda
uḌ ga.iin murghabiyan par us taraf baiThe hue
ek laḌke ko sabhi se kar ga.i goli juda
barhami rishton ki shadi ke dinon men aam hai
jo bhi kar lo paanv se hoti nahin pagḌi juda
Leave a Reply