Rafi Raza
aankh sahmi hui Darti hui dekhi ga.i hai
amn ki faḳhta marti hui dekhi ga.i hai
kya bacha kitna bacha taab kise hai dekhe
mauj-e-ḳhun sar se guzarti hui dekhi ga.i hai
aise lagta hai yahan se nahin jaane vaali
jo siyah-rat Thaharti hui dekhi ga.i hai
dusri baar hua hai ki yahi dost hua
par parindon ke katarti hui dekhi ga.i hai
ek ujḌi hui hasrat hai ki pagal ho kar
bain har shahr men karti hui dekhi ga.i hai
maut chamki kisi shamshir-e-barhana ki tarah
raushni dil men utarti hui dekhi ga.i hai
phir kinare pe vahi shor vahi log ‘raza’
phir koi laash ubharti hui dekhi ga.i hai
Leave a Reply