Shagufta Shafiq
aankh men us ki damakte hain sitaron ke hujum
us ko bhate hi nahin dard ke maron ke hujum
rah-e-ulfat men mile ham ko ḳhasaron ke hujum
dil dukhate hue dekhe sabhi pyaron ke hujum
us ne jaadu sa nigahon ko ajab baḳhsha hai
ab to rahte hain sada un men baharon ke hujum
ek chehra ki raha yaad hamesha ham ko
hone ko mere the atraf nazaron ke hujum
vo isi baat pe ham se sada nalan hi rahe
kyuun tire saath rahe yaar saharon ke hujum
ham tire hijr men tanha nahin hote hain kabhi
jauq-dar-jauq chale aate hain yaron ke hujum
Leave a Reply