Wahshat Raza Ali Kalkatvi
aankh men jalva tira dil men tiri yaad rahe
ye mayassar ho to phir kyuun koi nashad rahe
is zamane men ḳhamoshi se nikalta nahin kaam
naala pur-shor ho aur zoron pe fariyad rahe
dard ka kuchh to ho ehsas dil-e-insan men
saḳht nashad hai daa.im jo yahan shaad rahe
ai tire dam-e-mohabbat ke dil o jaan sadqe
shukr hai qaid-e-ala.iq se ham azad rahe
naala aisa ho ki ho us pe guman-e-naghma
rahe is tarah agar shikva-e-bedad rahe
har taraf daam bichha.e hain havas ne kya kya
kya ye mumkin hai yahan koi dil azad rahe
jab ye aalam ho ki manDlati ho har samt ko barq
kyuun koi nauhagar-e-ḳhirman-e-barbad rahe
ab tasavvur men kahan shakl-e-tamanna ‘vahshat’
jis ko muddat se na dekha ho vo kya yaad rahe
Leave a Reply