Farhat Shahzad
aankh ko jakḌe the kal ḳhvab azabon ke
main sairab khaḌa tha biich sarabon ke
tujh ko kho kar mujh par vo bhi din aa.e
chhup na saka dukh pichhe ka.i naqabon ke
fikr ka tan kab Dhanp saki mad-hoshi tak
chhoḌ diye nashshon ne haath sharabon ke
umr inhi ke saath guzari hai janan
zaḳhm mujhe lagte hain phuul gulabon ke
ek saval ne jab se mujh ko pahna hai
sharminda hain saare rang javabon ke
kis se puchhun main rasta ab tujh ghar ka
munh takte hain ḳhali varaq kitabon ke
jaane phir kab vaqt ye pal dohra.ega
lag ja siine toḌ ke band hijabon ke
mulk men mere amn ki ḳhvahish jan-e-man
bakri jaise biich men sau qassabon ke
ḳhatm nahin ‘shahzad’ faqat tujh par taḳhliq
ham bhi pyare ḳhaliq hain kuchh ḳhvabon ke
Leave a Reply