aankh ki zid ko hamesha hi se bahlaya gaya
ek chehre ko ka.i chehron men dikhlaya gaya
mere paanv nit na.e raston se the kab ashna
sadiyon pahle tha jahan mujh ko vahin paaya gaya
phir hui bedar ḳhvahish aankh men aa.i chamak
phir kisi ko dhuup sa malbus pahnaya gaya
sunne valon ne to dekha bhi nahin tha chaunk kar
raaz siine se nikal ke honT par aaya gaya
is qadar tha sang-dil jaise kisi qatil ka dil
mujh se vo mahaul ai ‘ḳhalid’ na apnaya gaya
Leave a Reply