Shahryar

Aankh Ki Ye Ek Hasrat Thi Ki Bas Puri Hui

aankh ki ye ek hasrat thi ki bas puuri hui

ansuon men bhiig jaane ki havas puuri hui

aa rahi hai jism ki divar girne ki sada

ik ajab khvahish thi jo ab ke baras puuri hui

is khizan-asar lamhe ki hikayat hai yahi

ik gul-e-na-afrida ki havas puuri hui

aag ke shoalon se saara shahr raushan ho gaya

ho mubarak arzu-e-khar-o-khas puuri hui

kaisi dastak thi ki darvaze muqaffal ho gae

aur is ke saath rudad-e-qafas puuri hui

Leave a Comment