aane do apne paas mujh ko
karna hai kuchh iltimas mujh ko
tere ye jaur kab sahun main
gar ishq ka ho na paas mujh ko
do tifl-mizaj shisha-dil men
kis tarah na ho hiras mujh ko
lagta hai na ghar men dil na bahar
kis ne ye kiya udaas mujh ko
kya haal kahun ki dekh us ko
rahte hi nahin havas mujh ko
ai nikhat-e-gul pari hi rah tu
aana hai usi ke paas mujh ko
munh phera bhi na us taraf se
tuk hone de ru-shanas mujh ko
uth jaunga ek din khafa ho
yahan tak na karo udaas mujh ko
gar hain yahi jaur us ke ‘bedar’
bachne ki nahin hai aas mujh ko