sannaton ki tah men ghasibana raftar se badhta hua
kisi masruqa raaz ka dabiz khala
aur us men tezi se gardish karta hua
ek jila-vatan sayyara
kisi ujaad kahkashan ko na chhodne par musir
raushni ki baqi-manda avaz
aur shikasta afaq ke khakistari gahrao men
suraj ke fauri ghayab ke
mitte hue asar
mujhe bachana hai
us kaenati virse ko
sarabon ki tezabi phunkar ke saath
zalzalon ki jalti piith ko dhaal bana kar
aur aag ke favvare ki kumak le kar
jo kisi qadim sayaf ki
pur-kharash niyam men mahbus hai
us la-mutanahi kharabe ke liye
mujhe ijad karni hai ek nai bahar
maut ki mayus aur muzmahil ghazab-naki ko
vaqt ke ghair-mutavazin bojh se tadkhi hui zaminon par
az-sar-e-nau balida kar ke
adhure sayon ke ghol
tarikh ke asebi chhakde ko
be-parvai aur anadi-pan se khinchte hain
sayyaron ki guzargahen
bhurnhuri aur mukaddar ho gai hain
kaenat ke munh par
kharonche pad gae hain
siyasi jitne gahre adam jitne lambe
raund men aai hui piili pattiyon ki tarah
sitare asman par liip diye gae hain
un ki martub jhilmilahat andheron ko uksati hai
aur nahusaton ka hausla badhati hai
main hazaron nuuri baras ke raqbe ko
zaman o makan ki narava amal-dari se
nikalne ke liye uthi huun
pighle hue faulad ke favvare ki tarah
ek pur-ghubar mismari ek khar-dar dukhani uthan ke saath
bani-nau-e-insan
tumhare liye yahi behtar hai ki
jarsumon ki tarah meri aankh se ojhal raho
meri raah men apne shahr aur virane mat bichhao
varna mujhe ghussa ya hansi aa jaegi
aur ye tughyani pahad aur tinke ko ham vazn janti hai
ai hasharat-ul-arz! mere pair bahut bade hain
kahin aisa na ho ki tumhari zamin
khashkhash ke daane ki tarah
mere kaf-e-pa se chipak jaae
aur mujhe pata bhi na chale
Leave a Reply