Khursheed Rizvi
alam-e-sakr men jo kahta huun kahne de mujhe
mere andar to yahi kuchh hai so rahne de mujhe
aa kabhi lams ko yaksar nazar-andaz karen
aankh se aankh mila ḳhuun men bahne de mujhe
duur ja kar bhi miri ruuh men maujud na rah
tu kabhi apni juda.i bhi to sahne de mujhe
tu mujhe bante bigaḌte hue ab ghaur se dekh
vaqt kal chaak pe rahne de na rahne de mujhe
jan-e-‘ḳhurshid’ mujhe saa.e se mahrum na rakh
main gahan men agar aata huun to gahne de mujhe
Leave a Reply