alam-e-khvab sahi khvab men chalte rahiye
raat kat jaegi karvat to badalte rahiye
kis ko malum kahan se koi patthar aa jaae
hausla ho to andheron men nikalte rahiye
ban hi jaega kabhi koi khudi ka paikar
apne ehsas ki garmi se pighalte rahiye
zindagi silsila-e-khvab-e-tamanna hai koi
raat bhar khvab ko khvabon se badalte rahiye
ham pe kya hoga zamane ki havaon ka asar
aap mausam ki tarah roz badalte rahiye
zindagi kya hai sarabon ka safar hai ‘abid’
vaqt ki ret pe din raat machalte rahiye
Leave a Reply