Aakhiri Mulaqat

aao ki jashn-e-marg-e-mohabbat manaen ham!

aati nahin kahin se dil-e-zinda ki sada

suune pade hain kucha o bazar ishq ke

hai sham-e-anjuman ka naya husn jan-gudaz

shayad nahin rahe vo patingon ke valvale

taaza na rah sakengi rivayat-e-dasht-o-dar

vo fitna-sar gae jinhen kante aziiz the

ab kuchh nahin to niind se ankhen jalaen ham

aao ki jashn-e-marg-e-mohabbat manaen ham!

socha na tha ki aaega ye din bhi phir kabhi

ik baar phir mile hain, zara muskura to len!

kya jaane ab na ulfat-e-derina yaad aae

is husn-e-iḳhtiyar pe ankhen jhuka to len

barsa labon se phuul tiri umar ho daraz

sambhle hue to hain pa zara Dagmaga to len

aur apna apna ahd-e-vafa bhuul jaaen ham

aao ki jashn-e-marg-e-mohabbat manaen ham!

barson ki baat hai ki mire ji men aai thi

main sochta tha tujh se kahun, chhod kya kahun

ab kaun un shikasta mazaron ki baat laae

maazi pe apne haal ko tarjih kyuun na duun

matam ḳhizan ka ho ki baharon kaa, ek hai

shayad na phir mile tiri ankhon ka ye fusun

jo shama-e-intizar jali thi bujhaen ham

aao ki jashn-e-marg-e-mohabbat manaen ham!

Leave a Comment