Majrooh Sultanpuri
akhir gham-e-janan ko ai dil badh kar gham-e-dauran hona tha
is qatre ko banna tha dariya is mauj ko tufan hona tha
har mod pe mil jaate hain abhi firdaus-o-jinan ke shaidai
tujh ko to abhi kuchh aur hasin ai alam-e-imkan hona tha
vo jis ke gudaz-e-mehnat se pur-nur shabistan hai tera
ai shokh usi baazu pe tiri zulfon ko pareshan hona tha
aati hi rahi hai gulshan men ab ke bhi bahar aai hai to kya
hai yuun ki qafas ke goshon se elan-e-baharan hona tha
aaya hai hamare mulk men bhi ik daur-e-zulekhai yaani
ab vo gham-e-zindan dete hain jin ko gham-e-zindan hona tha
ab khul ke kahunga har gham-e-dil ‘majruh’ nahin vo vaqt ki jab
ashkon men sunana tha mujh ko aahon men ghazal-khvan hona tha
Leave a Reply