Jaleel Manikpuri
aaj tak dil ki aarzu hai vahi
phuul murjha gaya hai bu hai vahi
sau baharen jahan men aa.i ga.iin
maya-e-sad-bahar tu hai vahi
jo ho puuri vo aarzu hi nahin
jo na puuri ho aarzu hai vahi
maan leta huun tere va.ade ko
bhuul jaata huun main ki tu hai vahi
tujh se sau baar mil chuke lekin
tujh se milne ki aarzu hai vahi
sabr aa jaa.e is ki kya ummid
main vahi, dil vahi hai, tu hai vahi
ho ga.i hai bahar men kuchh aur
varna saghar vahi subu hai vahi
umr guzri talash men lekin
garmi-ha-e-justuju hai vahi
mai-kade ka ‘jalil’ rang na puchh
raqs-e-jam o ḳhum o subu hai vahi
Leave a Reply