main huun ‘majaz’ aaj bhi zamzama-e-sanj-o-naghma-khvan
shair-e-mahfil-e-vafa mutrib-e-bazm-e-dil-baran
aaj bhi khar-zar-e-gham khuld-e-barin mire liye
aaj bhi rah-guzar-e-ishq mere liye hai kahkashan
aaj bhi ga raha huun main saz-e-junun liye hue
soz-e-nihan se aaj bhi ruh-e-tapan hai dil-tapan
aaj bhi zindagi miri gharq-e-sharab-e-tund-o-tez
aaj bhi haath men mire jam-e-sharab-e-arghavan
aaj bhi hai rachi hui aaj bhi hai basi hui
mere nafas men khuld ki nuzhat-o-nikhat-e-javan
aaj bhi nukta-chin huun main khalvatiyan-e-khas ka
khalvatiyan-e-khas ka aaj bhi huun mizaj-dan
aaj bhi ashk-e-khun mira qashqa jabin-e-naz ka
aaj bhi khak-e-dil miri surma-e-chashm-e-gul-rukhan
aaj bhi dil ko hai mire daulat-e-agahi nasib
aaj bhi hai nazar miri arz-o-saman ki raz-dan
aaj bhi hai junun mira dair-o-haram pe khanda-zan
aaj bhi mujh se bad-havas dair-o-haram ke pasban
aaj bhi saaz se mire garmi-e-bazm-e-sar-kashi
aaj bhi atish-e-sukhan shoa.la-fishan sharar-fishan
aaj bhi hai likhi hui surkh huruf men ‘majaz’
daftar-e-shahr-e-yar men mere junun ki dastan
Leave a Reply