aaj bam-e-harf par imkan bhar main bhi to huun
meri janib ik nazar ai dida-var main bhi to huun
be-aman saa.e ka bhi rakh bad-e-vahshat kuchh ḳhayal
dekh kar chal darmiyan-e-bam-o-dar main bhi to huun
raat ke pichhle pahar pur-shor sannaTon ke beach
tu akeli to nahin ai chashm-e-tar main bhi to huun
tu agar meri talab men phir raha hai dar-ba-dar
apni ḳhatir hi sahi par dar-ba-dar main bhi to huun
teri is tasvir men manzar mukammal kyuun nahin
main kahan huun ye bata ai naqsh-gar main bhi to huun
sun asir-e-ḳhush-ada.i muntashir tu hi nahin
main jo ḳhush-atvar huun zer-o-zabar main bhi to huun
ḳhud-pasandi meri fitrat ka bhi vasf-e-ḳhas hai
be-ḳhabar tu hi nahin hai be-ḳhabar main bhi to huun
dekhti hai juun hi paspa.i pe amada mujhe
ruuh kahti hai badan se be-hunar main bhi to huun
dasht-e-hairat ke safar men kab tujhe tanha kiya
ai junun main bhi to huun ai ham-safar main bhi to huun
kuza-gar be-surati sairab hone ki nahin
ab mujhe bhi shakl de is chaak par main bhi to huun
yuun sada deta hai akasr koi mujh men se mujhe
tujh ko ḳhush rakkhe ḳhuda yunhi magar main bhi to huun
Leave a Reply