Usha Bhadoriya
aa.ine se baat karna itna asan bhi nahin
aks ki tah se ubharna itna asan bhi nahin
ḳhvahishen siine men ug aati hain jangal ki tarah
zindagi banhon men bharna itna asan bhi nahin
apne hi qadmon ki aahaT jis jagah chubhne lage
aisi rahon se guzarna itna asan bhi nahin
janti huun main juda hai mere ḳhvabon ka mizaj
in ujalon men sanvarna itna asan bhi nahin
saath rahta hai hamesha tera gham tera ḳhayal
ab hua malum marna itna asan bhi nahin
kaisi kaisi unchi divaren khaḌi hain har taraf
dil men jo hai kar guzarna itna asan bhi nahin
rakh diya hai aap ki chahat ne mujh ko jis jagah
is bulandi se utarna itna asan bhi nahin
sochna paḌta hai tanha.i men ḳhud ko barha
apne hi sach se mukarna itna asan bhi nahin
jaane ‘usha’ kitne bandhan kitne rishte toḌ kar
dil ki ḳhali god bharna itna asan bhi nahin
Leave a Reply