Aaina-E-KHayal Tere Ru-Ba-Ru Karen

ā.īna-e-ḳhayāl tire rū-ba-rū kareñ

jitnī shikāyateñ haiñ sabhī dū-badū kareñ

jalne lagā hai ab to ye sāñsoñ kā pairahan

māyūsiyoñ kī aag se kab tak rafū kareñ

ahbāb ke ḳhulūs meñ ab vo kashish kahāñ

phir kyā mileñ kisī se koī aarzū kareñ

ahl-e-junūñ ke haq meñ hai hukm-e-ḳhudā yahī

tablīġh-e-dard harf-o-sadā kū-ba-kū kareñ

arz-o-samāñ ke beach muallaq hai kyuuñ duā

‘zākir’ chalo ki tuur pe kuchh guftugū kareñ

Leave a Comment