Syed Aabid Ali Aabid
aa.i sahar qarib to main ne paḌhi ghazal
jaane lage sitaron ke bajte hue kanval
be-tab hai junun ki ghazal-ḳhvaniyan karun
ḳhamosh hai ḳhirad ki nahin baat ka mahal
kaise diye jala.e gham-e-rozgar ne
kuchh aur jagmaga.e gham-e-yar ke mahal
ab tark-e-dosti hi taqaza hai vaqt ka
ai yar-e-chara-saz miri aag men na jal
ai iltifat-e-yar mujhe sochne to de
marne ka hai maqam ya jiine ka hai mahal
ham rind ḳhak-o-ḳhun men aTe haath bhi kaTe
nikle na ai bahar tire gesuon ke bal
rahon men ju-e-ḳhun hai ravan misl mauj hai
saaqi yaqin na ho to zara mere saath chal
kuchh bijliyon ka shor hai kuchh andhiyon ka zor
dil hai maqam par to zara baam par nikal
farman-e-shahryar ki parva nahin mujhe
iman-e-ashiqan ho to ‘abid’ paḌhe ghazal
Leave a Reply