Hakeem Manzoor
aage pichhe us ka apna saaya lahrata raha
ḳhauf se us shaḳhs ka chehra sada piila raha
sub.h ko dekha to vo mujh se tha bilkul ajnabi
raat bhar jo jism ke andar mujhe takta raha
kaisa divana tha sab kuchh jaan kar anjan tha
har kisi se vo gale milta raha rota raha
ye ḳhata meri thi tujh ko main ne pahchana nahin
a.ine men jaane mujh ko kya nazar aata raha
ḳhud-numa.i ke liye tarkib thi achchhi bahut
log sab ḳhamosh the vo kuchh na kuchh kahta raha
ham ne divaron pe us ko kar diya chaspan magar
apne ghar men vo baḌe aram se soya raha
sab barhana-tan hue ‘manzur’ jab mahfil ki jaan
apne ghar men chhup ke ḳhamoshi se main baiTha raha
Leave a Reply