Maratib Akhtar
aa.e the jis taraf se vo ik din udhar ga.e
bargad ka peḌ kaT gaya sadhu guzar ga.e
kya zindagi mili unhen tufan ki god men
do jism ek jism hue aur mar ga.e
karne lage qayas kahin qatl ho gaya
andhi ka rang surḳh tha sab log Dar ga.e
ab mujh ko bhul-bhal ga.e sab muashqe
savan ki rut guzar ga.i dariya utar ga.e
ik jism men utar gaya ik saal din-ba-din
ik ek kar ke sahn men patte bikhar ga.e
chhup kar mile bichhaḌ ga.e aur phir na mil sake
ik pal men dastan ki takmil kar ga.e
Leave a Reply