Mushafi Ghulam Hamdani
aae ho to ye hijab kya hai
munh khol do naqab kya hai
siine men thaharta hi nahin dil
ya-rab ise iztirab kya hai
kal tegh nikal mujh se bola
tu dekh to is ki aab kya hai
maalum nahin ki apna divan
hai marsiya ya kitab kya hai
jo mar gae maare lutf hi ke
phir un pe miyan itaab kya hai
auron se to hai ye be-hijabi
mujh se hi tujhe hijab kya hai
ai ‘mushafi’ uth ye dhuup aai
itna bhi divane khvab kya hai
Leave a Reply