aa jaata hai ḳhud paas bulana nahin paḌta
milne ke liye haath baḌhana nahin paḌta
kuchh aisi suhulat se makin dil men hua vo
mujh ko bhi miri zaat se jaana nahin paḌta
ye ḳhaas ri.ayat hai ki ab des men apne
gham muft men milta hai kamana nahin paḌta
is shahr se us shahar talak sidhi saḌak hai
filhal to raste men zamana nahin paḌta
afsana-e-hasti bhi bahut ḳhuub hai jis men
kirdar koi sa bhi nibhana nahin paḌta
ik karb-e-musalsal ki mira pahlu-nashin hai
ik lutf-e-darun jis ko ganvana nahin paḌta
ab loha ugate hain daraḳhton ki jagah ham
koyal ko bhi ab shor machana nahin paḌta
Leave a Reply