Farigh Bukhari
yahi hai daur-e-gham-e-ashiqi to kya hoga
isi tarah se kaTi zindagi to kya hoga
abhi to ham-nafason ko hai vahm-e-charagari
hui na dard men phir bhi kami to kya hoga
ye tirgi to bahar-e-hal chhaT hi ja.egi
na raas aa.i hamen raushni to kya hoga
umiid hai ki kabhi to labon pe aa.egi
kabhi na aa.i labon par hansi to kya hoga
nafas nafas men fughan hai nazar nazar men hiras
kuchh aur din yahi halat rahi to kya hoga
Leave a Reply