Azad Gulati
ḳhud hamin ko rahaton ke kaif ka chaska na tha
zindagi ka zahr varna is qadar kaḌva na tha
us ne tanha.i se ghabra kar pukara to nahin
is se pahle to mira dil is tarah dhaḌka na tha
haa.e vo aalam ki un ki bazm men bhi baiTh kar
main yahi socha kiya main to kabhi tanha na tha
us ke apne haath ruḳhsaron ko sahlane lage
go ba-zahir meri babat us ne kuchh socha na tha
har taraf khilti rahin kaliyan nasim-e-sub.h se
apni qismat men saba ka ek bhi jhonka na tha
zindagi ai zindagi!! aa do ghaḌi mil kar rahen
tujh se mera umr-bhar ka to koi jhagḌa na tha
sochte hain ab use ‘azad’ ham kya naam den
umar ka vo daur dil men jab koi sauda na tha
Leave a Reply