har ek chiiz hai faani faqat hayat nahin
ba-juz ḳhuda ke kisi ko yahan sabat nahin
hayat naam hi tabdiliyon ka hai janan
badal ga.e ho jo tum bhi to koi baat nahin
karam hai ye mire do ek ḳhaas yaron ka
tabahiyon men miri dushmanon ka haath nahin
ki jaise dil nahin siine men dukh dhaḌakta hai
jahan bhi ja.un alam se kahin najat nahin
ghazab ka silsila thamne hi men nahin aata
zara sa pyaar hi manga tha ka.enat nahin
main zaḳhm zaḳhm sahi hausla to qaa.em hai
shikasta-hal to huun par ye meri maat nahin
chali ga.i ho jo tum bhi to kya gila tum se
yahan to yuun hai ki main ḳhud bhi apne saath nahin
sahar bhi ghar mire ‘shahzad’ tirgi laa.i
qusur-var miri jaan sirf raat nahin
Leave a Reply