mas.ala aaj mire ishq ka tu hal kar de
pyaar kar TuuT ke mujh se mujhe pagal kar de
luuT le mera sukun aur mujhe be-kal kar de
yuun simaT aa miri banhon men unhen shal kar de
dekh kar pahli nazar men jo umaD aa.e the
phir se jazbat men paida vahi halchal kar de
ban ke ghanghor ghaTa mujh pe tu chha khul ke baras
ḳhushk sahra ko mire jism ke jal-thal kar de
kis tarah vaqt guzarta hai pata hi na chale
ibtida aaj se kar aur use kal kar de
tere bin mujh ko adhura sa lage apna vajud
yuun sama mujh men mira jism mukammal kar de
jhiil ankhon ki miri jaan zara sadqa utaar
aur mire naam tu ankhon ka ye kajal kar de
aur kuchh tujh se nahin mangta ai jan-e-hayat
vaqt bas mere liye apna har ik pal kar de
chahta huun ki na dekhen tujhe duniya vaale
sirf parde ke liye samne anchal kar de
qabl is ke mujhe jhulsa de ghamon ka suraj
mujh pe tu apni siyah zulfon ka badal kar de
mere allah nazar bhar ke use dekh to luun
phir tu chahe miri ankhon ko muqaffal kar de
Duub ja.un main tire ishq-samundar men ‘nadim’
apni sanson se miri sanson ko bojhal kar de
Leave a Reply