Farhat Kanpuri
vasl ke lamhe kahani ho ga.e
shab ke moti sub.h paani ho ga.e
rafta rafta zindagani ho ga.e
gham ke lamhe javedani ho ga.e
daulat-e-ahd-e-javani ho ga.e
chand lamhe jo kahani ho ga.e
kaisi kuchh ranginiyan thiin jin se ham
mahv-e-sair-e-dahr-e-fani ho ga.e
sukh bhare dukh dukh bhare sukh sab ke sab
vaqiat-e-zindagani ho ga.e
muskura.e aap jaane kis liye
ham rahin-e-shadmani ho ga.e
baton hi baton men raten uḌ ga.iin
haa.e vo din bhi kahani ho ga.e
tum ne kuchh dekha ḳhulus-e-jazb-e-shauq
sang-reze gul ke paani ho ga.e
‘farhat’ aisi but-parasti ke nisar
but bhi mahv-e-lan-tarani ho ga.e
Leave a Reply