tumhare ḳhvab mire saath saath chalte hain
ka.i sarab mire saath saath chalte hain
tumhara gham gham-e-duniya ulum-e-agahi
sabhi azaab mire saath saath chalte hain
isi liye to main uryaniyon se huun mahfuz
bahut hijab mire saath saath chalte hain
na jaane kaun hain ye log jo ki sadiyon se
pas-e-naqab mire saath saath chalte hain
main be-ḳhayal kabhi dhuup men nikal aa.uun
to kuchh sahab mire saath saath chalte hain
Leave a Reply