Bakhsh Layalpuri
qatil hua ḳhamosh to talvar bol uThi
maqtal men ḳhun-e-garm ki har dhaar bol uThi
puchha subuk saron ka numa.inda kaun hai
sun kar faqih-e-shahr ki dastar bol uThi
ahl-e-sitam ke ḳhauf se jo chup thi vo zaban
jab bolne pe aa.i sar-e-dar bol uThi
meri tabahiyon ki hai is men ḳhabar zarur
az ḳhud har ek surḳhi-e-aḳhbar bol uThi
chehra tha zaḳhm zaḳhm koi puchhta na tha
yusuf bane to garmi-e-bazar bol uThi
ik naḳhuda hi yurish-e-tufan pe chup raha
chappu kabhi to aur kabhi patvar bol uThi
kuchh is tarah se naqsh the inTon pe sanche ke
zindan men mujh ko dekh ke divar bol uThi
Leave a Reply