Farasat Rizwi
naqd-e-jan ki mire saughat abhi baaqi hai
shab-e-hijran ki mudarat abhi baaqi hai
dhuup men tark-e-marasim ki jhulasne vaale
aḳhiri sham-e-mulaqat abhi baaqi hai
ḳhaliq-e-kaun-o-makan ham se nahin hai naraz
gardish-e-arz-o-samavat abhi baaqi hai
vaqt ki dhuup men kho.e mire nashshe kitne
ik tiri chashm-e-ḳharabat abhi baaqi hai
roz-e-avval se ajal khel rahi hai shatranj
mujh ko shah ho bhi chuki maat abhi baaqi hai
chandni par hai tumhen rang-e-sahar ka dhoka
gul na kar dena diye raat abhi baaqi hai
har ghazal ki mujhe takmil pe mahsus hua
dil men kahne ko koi baat abhi baaqi hai
Leave a Reply