ik umr ke baad tum mile ho
ai mere vatan ke khush-navao
har hijr ka din tha hashr ka din
dozakh the firaq ke alaao
rouun ki hansun samajh na aae
hathon men hain phuul dil men ghaao
tum aae to saath hi tumhare
bichhde hue yaar yaad aae
ik zakhm pe tum ne haath rakkha
aur mujh ko hazar yaad aae
vo saare rafiq pa-ba-jaulan
sab kushta-e-dar yaad aae
ham sab ka hai ek hi qabila
ik dasht ke saare ham-safar hain
kuchh vo hain jo dusron ki khatir
ashufta-nasib o dar-ba-dar hain
kuchh vo hain jo khilat-o-qaba se
aivan-e-shahi men mo’tabar hain
suqrat o masih ke fasane
tum bhi to bahut suna rahe the
mansur o husain se aqidat
tum bhi to bahut jata rahe the
kahte the sadaqaten amar hain
auron ko yahi bata rahe the
aur ab jo hain ja-ba-ja saliben
tum bansuriyan baja rahe ho
aur ab jo hai karbala ka naqsha
tum madh-e-yazid ga rahe ho
jab sach tah-e-tegh ho raha hai
tum sach se nazar chura rahe ho
ji chahta hai ki tum se puchhun
kya raaz is ijtinab men hai
tum itne kathor to nahin the
ye be-hisi kisi hisab men hai
tum chup ho to kis tarah se chup ho
jab khalq-e-khuda azaab men hai
socho to tumhen mila bhi kya hai
ik luqma-e-tar qalam ki qimat
ghairat ko farokht karne vaalo
ik kasa-e-zar qalam ki qimat
pindar ke tajiro batao
darban ka dar qalam ki qimat
nadan to nahin ho tum ki samjhun
ghaflat se ye zahr gholte ho
thame hue maslahat ki mizan
har sher ka vazn taulte ho
aise men sukut, chashm-poshi
aisa hai ki jhuut bolte ho
ik umr se adl o sidq ki laash
ghasib ki salib par jadi hai
is vaqt bhi tum ghazal-sara ho
jab zulm ki har ghadi kadi hai
jangal pe lapak rahe hain shole
taus ko raqs ki padi hai
hai sab ko aziiz ku-e-janan
is raah men sab jiye mare hain
haan meri bayaz-e-sher men bhi
barbadi-e-dil ke marsiye hain
main ne bhi kiya hai tuut kar ishq
aur ek nahin kai kiye hain
lekin gham-e-ashiqi nahin hai
aisa jo subuk-sari sikhae
ye gham to vo khush-maal gham hai
jo koh se ju-e-shir laae
teshe ka hunar qalam ko bakhshe
jo qais ko kohkan banae
ai hila-garan-e-shahr-e-shirin
aaya huun pahad kaat kar main
hai be-vatani gavah meri
har-chand phira huun dar-ba-dar main
becha na ghurur-e-nai-navazi
aisa bhi na tha subuk hunar men
tum bhi kabhi ham-nava the mere
phir aaj tumhen ye kya hua hai
mitti ke vaqar ko na becho
ye ahd-e-sitam jihad ka hai
daryuza-gari ke maqbaron se
zindan ki fasil khushnuma hai
kab ek hi rut rahi hamesha
ye zulm ki fasl bhi kategi
jab harf kahega qum-be-izni
marti hui khaak ji uthegi
laila-e-vatan ke pairahan men
barud ki bu nahin rahegi
phir bandhenge abruon ke dohe
phir madh-e-rukh-o-dahan kahenge
thahraenge un labon ko matla
janan ke liye sukhan kahenge
afsana-e-yar o qissa-e-dil
phir anjuman anjuman kahenge
Leave a Reply