dekhte jaate hain namnak hue jaate hain
kya gulistan ḳhas-o-ḳhashak hue jaate hain
ek ik kar ke vo gham-ḳhvar sitare mere
gham sar-e-vus.at-e-aflak hue jaate hain
ḳhush nahin aaya ḳhizan ko mira uryan hona
zard patte miri poshak hue jaate hain
dekh kar qarya-e-viran men zamistan ka chand
shaam ke saa.e alam-nak hue jaate hain
zulm sab ahl-e-zamin par hain zamin valon ke
ham abas dushman-e-aflak hue jaate hain
dida-e-tar se mayassar tha hamen dil ka gudaz
qaht-e-girya hai to saffak hue jaate hain
kuza-gar ne hamen miTTi se kiya tha taḳhliq
kya ta.ajjub hai agar ḳhaak hue jaate hain
kaisi ibrat hai ki is kashmakash-e-rizq men ham
apne hi rizq ki ḳhurak hue jaate hain
Leave a Reply