jo bhi anjam ho aghaz kiye dete hain
mausamon ko nazar-andaz kiye dete hain
kuchh to pahle se tha rag rag men shuja.at ka surur
kuchh hamen aap bhi jan-baz kiye dete hain
had se aage jo parinde nahin uḌne vaale
hadse un ko bhi shahbaz kiye dete hain
dasht o sahra ye samundar ye jazire ye pahaḌ
munkashif ham pe ka.i raaz kiye dete hain
shab-e-zulmat na ho ghamgin ki jala kar ḳhud ko
nuur se tujh ko sar-afraz kiye dete hain
shahr-e-jan par ka.i barson se musallat hai jumud
chheḌ kar dil ko chalo saaz kiye dete hain
ham ki zinda hain abhi zulf-e-ghazal aa tujh ko
phir ata nik.hat-e-shiraz kiye dete hain
kaun aata hai ayadat ke liye dekhen ‘faragh’
apne ji ko zara na-saz kiye dete hain
Leave a Reply